Luk 17 | MHL | STEP | Ne aria Yeesus ona teeria wia maakek, “Makena, mua unowa akimowa-pa wakikuan, ne mua-ke mua oko kema enimeya wakinon-na, mua nain wiisak.

Luke 17

Pina onowa sira

(Matiu 18.6-7 ne 18.21-22, Mak 9.42)

1 Ne aria Yeesus ona teeria wia maakek, “Makena, mua unowa akimowa-pa wakikuan, ne mua-ke mua oko kema enimeya wakinon-na, mua nain wiisak. 2 Mua, takira-ko pina onowa ofakoweya oro-booninon-na, mua nain pina maneka aawinon. O nomon maneka imakuna-pa wiar kaikap ifera-pa wafuriwkin umekak-na eliw. Naapeya ni maa urufap. 3 Nena teeria epaskun-ke pina-ko nefa oninok-na ariman maake. Ne kema kireya-na, pina wiar iirarep kema eliwa iwe. 4 Ne pun fofa kuisow pina onowa ikur okaiwi-pa erup arep kema kirep anane nefar ekapep maem-ikainok-na, ‘Yo sira samora nefa onam nain kema kirem,’ aria kema eliwa naap iwem-ike.”

Opor makena opow sira

5 Ne aria Yeesus teeria-ke maakemik, “Maneka, nena i yia asipeya i kekanep no opora baliwep akena nefar opiyen.” 6 Naeya wia maakek, “Ni yo opor makena efar opowa kema-pa lawiliw muuta niar ikainon-na ni nomokowa oko fain eliw maakowen, ‘Fiira onaiya name pusunowap orop ifera-pa iimare.’ Naap maakowen-na eliw nia miiminon.”

Mua Maneka uuwow mua-pa ikowa sira

7 “Ne nena uuwow mua miiwa arufowa-i e sipsip nepiowa sesekeya ikiwep uuwowa welawap urera owowa ekapeya no feenap maakinan-i, ‘No ewur akena ekapep maa enime,’ naap maakinan-i? 8 Weetak, feenap maakinan, ‘Yo maa-ko uupome. Ne maa pekapeya yo kiikir enemkun no ikoka murarep enime.’ 9 Weesereya uuwow mua nain sira eliwa naakinon-i? Weetak, moram ona uuwowa-ke. 10 Ne nis pun naap, maa unowa Mua Maneka nia maakek naap onomap-na maeka, ‘I uuwow mua oram-ke. I yiena uuwowa onamik.’” Naap wia maakek.

Yeesus wi mua gigir mane-maneka ikemik nain wia saliwak

11 Yeesus Yerusalem ikiwemi Samaria ne Galili gone-pariw ikiwok. 12 Ikiwemi owow oko fuunem-ikok wi mua ten kuisow wia urufak, era-pa ekapem-ikaiwkin. Wi mua nain mia gigir onaiya ikemik. Lawisiw epasia-pa iimarep ikok kerewa faremi maemik, “Yeesus, yiena Maneka, i yia kemale!” 14 Naap wia urufap wia maakek, “Ni wi pris wiar ikiwiwkin mia niar pupep urufuk.” Naap wia maakeya wi kirep ikim-ikaiwkin mia gigir nain wiar mesenalep mia eliwa wiar imenarek. 15 Aria oko-ke ona mia naap wame pupep urufap kirep ekapemi kerewa faremi Mua Maneka unuma fakerak. 16 Ekapep Yeesus wameiya-pa keema muuna mikap sira eliwa naakek. Mua nain-na wi Samaria mua-ke. 17 Yeesus-ke naap urufap maek, “Nee, mua papako me sariaremik-i? Wi kaaneke ikemik? 18 Wi-ko me ekapep Mua Maneka sira eliwa naakemik. Mua fain owow oko mua-ke, ne o waisow muuta naap-i?” 19 Naap maemi mua nain maakek, “No iikirap ikiwe. Opora efar opap nan sariaren.”

Mua Maneka mua pika kemena-pa wia wuowa epa ikoka kamenap imenarinon

(Matiu 24.23-28 ne 24.37-41)

20 Aria wi Farisi-ke Yeesus nokaremik, “Mua Maneka miiw mua pika kemena-pa yia wuowa epa nain iikamin imenarinon?” Naeya wia maakek, “Epa nain ikoka ileniya imenareya niena mokoka-pa me urufowen, weetak. 21 Naapeya ikoka feenap me maikuan, ‘Urufeka, faneka,’ e ‘Naneka.’ naap me maikuan. Moram Mua Maneka miiw mua pika kemena-pa nia wuowa epa nain iiriw niar imenarek.”

22 Naemi ona teeria wia maakek, “Ikoka epa-ko imenareya feenap maowen, ‘Mua Muuka kekanowa onaiya ikua nain fofa kuisow imenareya-ko urufekamik-na eliw.’ Naap maowen-na wia, me urufowen. 23 Ne ikoka nia maakikuan, ‘Eenan ikua,’ e ‘Urufeka, faneka.’ Naap maiwkin-na me wiokap ikiweka. 24 Moram Mua Muuka miiwa oraiya nain ona ilen onaiya ikua. Feenap saarik, aapereka-ke wilinemi epa unowa nain iiwawun iiwkinon. Kame okaiwi ikip kame okaiwi iiwawun parina-keriw arinon. 25 Nain wiimar. Mokomokoka o sirirowa maneka aawinon, ne wi aakisa fain mua pun mikikira iwikuan.

26 Iiriw Noa ikowa-pa sira onam-ikemik nain, ikoka Mua Muuka imenarow epa-pa sira naap akena onam-ikaikuan. 27 Iir nain wi maa enowa onap, wiam muewowami naap oni-ikim-ikemik. Wi naap onam-ikaiwkin Noa aasa maneka ireya eka luuma maneka-ke ekapemi iiwawun wia ifakimok.

28 Lot ikowa epa pun, aa sira naap. Wi maa enemi, maamuma aawowa uuwowa onam-ikemik, manina ne koora uuwam-ikemik. 29 Wi naap onam-ikaiwkin Lot Sodom owowa piipuap ikiweya nomona mukun onaiya aapereka-pa ipia saarik oromi iiwawun wia kuumok. 30 Ne wiimar Mua Muuka nainiw ekapow fofa-pa maa sira naap nain pun imenarinon.

31 Iir nain wi mua koor iinan-pa ikok-na neekeriw bauraruk, koor kemena ikiwep maa unowa me aawuk. Ne manina-pa ikok-na owowa me ekapuk. 32 Iiriw Lot emeria baurarem-ikok Sodom owowa urufekam naep kirek nain nomona arek, ni nain kema suuweka. 33 Mua miiwa-pa feeke ona mia kookalowa weeserowinon-na ikoka iiwawun mesenalinon. Ne mua miiwa-pa feeke yo muuta nain pokow eliwa me aawinon-na ikoka owow iinan-pa Mua Maneka wameiya-pa eliwa ikainon. 34 Yo makena maiyem, iir nain uura mua erup samapora kuisow-pa inep ikaiwkin-na Mua Maneka-ke oko aaweya oko neek ikainon. 35 Ne emeria erup wit makena ititam-ikaiwkin-na oko aaweya oko neek ikainon. [ 36 Mua erup manina-pa ikaiwkin oko aawinon ne oko wia.]” Opora naap wia maakek. 37 Ne wi naap miimap nokaremik, “Maneka, nain ikoka kaaneke imenarinon?” Naeya opora anian wia kaisomami maek, “Kiisua maa-ko umep ikaeya urufap pamua onaiya takunep ikaikuan, naap akena ariman urufikuan.”